Sumarið 2018 lenti kona í umferðarslysi á Nýbýlavegi er hún var farþegi í aftursæti bíls sem bakkað var á miklum hraða eftir götunni þar til ökumaðurinn missti stjórn á bílnum með þeim afleiðingum að bíllinn lenti uppi á gangstéttarkanti, fór utan í staur og snerist hálfhring.
Konan sat í aftursæti í bílnum og skall hún saman við annan farþega í aftursætinu við áreksturinn, og varð fyrir meiðslum.
Konan hlaut varanlegan skaða af höfuðhögginu og hefur glímt við háls- og bakverki.
Vátryggingafélag Íslands (VÍS) var tryggjandi bílsins. Var það ákvörðun félagsina að greiða konunni aðeins einn þriðja af lögbundnum slysabótum þar sem hún ætti að hluta til sök á tjóni sínu sjálf. Hún var ekki í öryggisbelti í bílnum og ökumaðurinn var undir áhrifum fíkniefna. Var það mat tryggingarfélagsins að henni hafi mátt vera kunnugt um ástand ökumannsins áður en hún settist upp í bílinn.
Greiddi VÍS konunni einn þriðja af bótafjárhæðinni en konan stefndi félaginu fyrir Héraðsdóm Reykjavíkur og krafðist tæplega 6,4 milljóna í bætur.
Héraðsdómur sýknaði VÍS af kröfum konunnar en málskostnaður fellur niður. Í niðurstöðu dómsins segir meðal annars:
„Að öllu framangreindu virtu sem nú hefur verið rakið þykir stefnandi, með því að setjast upp í bifreið með ökumanninum, þrátt fyrir að henni hafi ekki getað dulist að
ökumaðurinn væri undir áhrifum ávana- og fíkniefna, hafa sýnt af sér stórkostlegt gáleysi sem valdi því að hún beri að hluta til ábyrgð á tjóni sínu sjálf. Það að stefnandi var ekki með öryggisbelti spennt telst hins vegar ekki vera stórfellt gáleysi og leiðir ekki eitt og sér til skerðingar bóta, þótt líklegt sé að þetta hafi aukið á tjón stefnanda. Er þannig ekki þörf á að fjalla sérstaklega um þá málsástæðu stefnanda að tilvísun stefnda hvað þetta varðar sé of seint fram komin.“
Dóminn má lesa hér.
