Mannrán, pyntingar og morð á allt að 18 manns. Þetta er meðal þess sem talið er að Freddie Scappaticci hafi haft á samviskunni á þeim tíma sem hann var flugumaður í Írska lýðveldishernum (IRA). IRA háði baráttu gegn breskum yfirráðum á Norður-Írlandi og voru samtökin skilgreind sem hryðjuverkasamtök.
Freddie laumaði sér inn í IRA á vegum bresku lögreglunnar og hafði viðurnefnið „Stakeknife“. Hann varð svo vel metinn innan IRA að hann varð hluti af öryggisneti samtakanna en það nefndist „The Nutting Squad“.
Þessi hópur benti á og myrti fólk sem var talið ljóstra upp um starfsemi IRA. Stundum var fólk bundið með hendur fyrir aftan bak og siðan skotið í höfuðið.
IRA létu mikið að sér kveða á áttunda og níunda áratugnum og létu ekki af hryðjuverkum og morðum fyrr en 1994 þegar samið var um vopnahlé á Norður-Írlandi. Fjórum árum síðar var síðan samið um frið.
Talið er að Freddie hafi verið mikilvægasti flugumaðurinn í röðum IRA áratugum saman. Eftir því sem The Guardina og Daily Mail segja þá dældi hann upplýsingum til breskra yfirvalda um mannrán, sprengjutilræði og skotárásir.
Sir John Wilsey, norðurírskur hershöfðingi, sagði árið 2012 að Freddie hafi verið eins og „gullegg“ og „demanturinn í kórónunni“ af flugumönnum hersins. Upp hafði komist um Freddie níu árum áður og hafði hann þá flúið til Englands.
Hann neitaði alla tíð þeim ásökunum að hann hefði verið flugumaður Breta og að hann hefði starfað innan IRA. Hann lést í apríl á þessu ári, 77 ára að aldri.
