Si June Mar Fajardo pa rin ang take-charge guy ng San Miguel Beer sa mga oras de peligro.
Kinamada ng nag-iisang six-time MVP ng Philippine Basketball Association ang 10 sa kanyang 21 points sa fourth quarter para itulak ang Beermen sa 96-91 panalo kontra Meralco at 2-1 lead sa kanilang Philippine Cup semifinal series nitong Linggo.
May 16 rebounds, 2 blocks pa ang The Kraken. Tumagay ng 26 points si CJ Perez, may 15 si Jericho Cruz.
Nang dumikit sa apat ang Bolts, ibinalik sa rim ni June Mar ang isang sumablay na tira tungo sa 90-84 SMB lead 1 1/2 minutes pa.
Sa final minute, perpekto sa tigalawang free throws sina Perez at Fajardo para ipreserba ang panalo.
Nakahinga ng maluwag si coach Leo Austria.
“Napakahirap gawin ‘yung nangyari kanina against Meralco,” bulalas ni Austria sa postgame press conference sa Smart Araneta Coliseum. “They were well-prepared. They knew what to do at the post. They knew what to do in the pick and roll.” (Vladi Eduarte)
