KUMUBRA si Lloyd Jefferson Go ng P260K ($4,900) nang solong mag-third place sa pagtiklop noong Biyernes ng 11th Asian Development Tour 2020-23 Leg 7 $70K OB Golf Invitational sa Damai Indah Golf-BSD Course sa South Tangerang City, Indonesia.
Tinapos ng 27-year-old, 5-foot-8 Pinoy mula sa Cebu ang 105-player, four-day event sa 17-under 271 sa mga round na 69-70-64-68, pitong hampas ang layo sa nagharing si home bet Naraajie Ramadhanputra. Wagi si Ramadhanputra ng four-stroke sa kapwa Indonesian na si Jonathan Wijono.
Apat pang pambato ng bansa ang kumite sa kompetisyon.
Nakapagsubi ng P33K ($630) si Justin Raphael Quiban sa five-way tie sa 27th place, may P21K ($409.50) si Fidel Concepcion sa pagtabla sa pang-45 puwesto kina local bet Bradley taslim at Aussie Ted Donoghue, at naka-P20K ((381.50) si Ira Christian Alido sa pagsalo kay Indon amateur Amadeus Christian Susanto sa 48th spot.
Tanging nabokya sa premyo sa limang Pinoy si James Ryan Lam na kabilang sa 49 na mga nagmintis sa cut sa pag-upo sa pang-67 posisyon. (Ramil Cruz)
