Pago Pago - AMERIKA SAMOA
Ua tuuina atu i le Fono Faitulafono nisi o mataupu mai le Kovana Sili, e iloiloina ma faia i ai se fa’aiuga a afioga i senetoa ma faipule. Ma o nei mataupu e aofia ai le fa’amonia lea o fa’atonusili, mo matagaluega fou e lua a le faigamalo.
FA’ATONUSILI MATAGALUEGA FOU
O le vaiaso lenei ua fuafuaina i le Maota Maualuga e faia ai ana iloiloga i tofiga a le Kovana mo fa’atonu sili o matagaluega fou e lua i le faigamalo.
O se tasi o ia fa’atonusili mo le Matagaluega o Falepuipui, lea ua tofia ai Tauanuu Semu Faisiota Tauanuu. Fa’ailoa e le kovana i lana tusi i ta’ita’i o le Fono, e fa’apea o Tauanuu sa auauna i le tele o tausaga i le militeri e aofia ai lona tomai tau le saogalemu lautele, puipuiga ma le atamai.
O lana galue faalemalo e aofia ai puipuiga o le malae vaalele ma le faatautaiga o meatotino mo le Maota o Sui. O le talaaga o le soifuaga o Tauanuu ma lona tomai masani ua talafeagai lea e fai ai o ia ma Taitai o le Vaega o Falepuipui.
“E ui lava o lenei lālā sa faavaeina e ala i le Poloaiga a le Pulega ma e le manaomia se faamaoniga, ou te faatauaina le faaopoopoina o le faatagaga faatulafonoina o le a tuuina atu e le Faatonu ia Tauanuu,” ose vaega lea o le tusi ale Kovana i le Fono Faitulafono.
O le isi tofiga a Kovana Lemanu Peleti Mauga, e fa’amonia ai Faamasino Upuese Galoia e avea ma fa’atonu Ofisa Suesue ma Galuega Laveai a Amerika Samoa.
“O tausaga a le Faatonu ia Galoia sa tautua ai i le militeri o loo laualuga ai lona tomai faataitai, sogasogā ma le tofā fetuutuunai, ma le fo’ia o faafitauli,” o se vaega lea o le tusi a Lemanu i ta’ita’i o le Fono. “O loo tumau ma fa’aauau pea ona tuuina atu iai meafaigaluega e faatatau i le faitau miliona o talā aemaise foi atinae faapolofesa ma le saogalemu o le faitau selau o tagata, o la tatou punaoa sili ona taua.
O soifuaga o Galoia ma lona tomai masani ua talafeagai lea e fai ai o ia ma taitai o le Ofisa Suesue ma Galuega Laveai. E ui lava o lenei lālā sa faavaeina e ala i le Poloaiga a le Pulega ma e le manaomia se faamaoniga, “ou te faatauaina le faaopoopoina o le faatagaga faatulafonoina o le a tuuina atu e le Faatonu ia Galoia,” o a Lemanu lea.
TOTINO O LE FALETUSI
O se isi mataupu mai le Kovana o le tofiga lea o Christian Ausage ma totino o le Komiti Faafoe o le Faletusi o le Feleti Barstow.
I se vaega o lana tusi, i ta’ita’i o le Fono Faitulafono, na faapea mai ai le afioga i le Kovana, ua ou faaoo atu la’u tofiga o Christian Ausage mo le Komiti Faafoe o le Faletusi.
O Ausage ua fa’aalia lona naunauta’i i aoaoga ma le poto faaleaganuu ma le puipuiga i le lata i le tolu tausaga o faiaoga mai aoga tulaga muamua se ia oo i fanau aoga i le Kolisi.
Ua le gata i lea, fa’ailoa e le kovana e fa’apea o Ausage, o se faipisinisi tumaoti ua lauiloa. O lona soifuaga ma lona poto masani ua talafeagai lea e fai ai o ia ma totino o le komiti faafoe o le Faletusi.
O le aso ananfi sa pasia ai e le Senate lenei tofiga a le kovana, ina ua ma’ea le iloiloga a le komiti. O le a tatalia nei le palota a le Maota o Sui.
