Pago Pago - AMERIKA SAMOA
Sa le faamalieina lava sui faitulfaono i le pili faaofi mo le tupe fa’asoasoa a le falema’i autu a le teritori (LBJ), mo le tausaga tupe 2024, ina ua feiloai fa’atolu le Komiti Aufa’atasi a le Maota Fono ma taitai o le LBJ, i le taeao o le aso Lulu o le vaiaso ua tuanai.
Sa molimau taitai o le LBJ, lea na aofia ai le Pulesili ia Dr. Akapusi Ledua, o le CFO ia Sefanaiya Kaumaitotoya ma le Faatonusili Aoao o Dr. Jean Anderson, lea sa avea ma sui mo le taitaifono o le komiti faafoe a le LBJ, ia Dr. Malouamaua Tuiolosega, ona o lo o faimalaga atu i atunu’u i fafo.
Na muamua ona fa’amaualalo atu le susuga Dr. Ledua i sui faitulafono ona o le tuai ona faaulu mai o le latou paketi ona o tulaga le ma’alofia, i suiga o lo o feagai ai le latou pulega.
O le atoaga o le tupe faasoasoa na faaulu e le LBJ mo le tausaga tupe 2024, e $97 miliona, o se faaopoopoga tele lea mai i le $27 miliona lea na iai le latou paketi i le tausaga ua tuanai.
Sa faamanino e Dr. Ledua, o le mafuaaga o le siitaga o le latou paketi, ona o le faaopoopoina o tagata faigaluega. E pe a ma le 37 ni tagata faigaluega fou i totonu o le LBJ lea ua faaopoopo i totonu o le tupe mo le tausaga tupe fou. O le toatele o nei tagata faigaluega, o tausimai lea sa faaopoopo mai ona o le itiiti o le fuainumera o tausimai i totonu ole fale, faapea ai ma nisi o fomai, ua faaopoopo mai ina ia mafai ona toe faalautele le auaunaga mo le mamalu lautele.
I le vaega o Sapalai, ua vaaia le pa’u i lalo i le $1.3 miliona ona o le lua tausaga ua tuanai, sa tele ina fa’aaluina tupe a le falemai mo sapalai o le Covid.
Ua va’aia foi se faaopoopoga e $1.9 miliona i Tautua Faakonakarate, ona o le ICU fou ma le ER fou ma isi lava tautua fou o lo o taumafai atu iai le falemai.
Ua iai foi se faaopoopoga e $3.8 miliona mo femalagaiga ona o tagata faigaluega fou e 37 ia ua faaopoopo mai, lea e aofia ai tausimai lea o le a fa’afaigaluega mai i atunu’u mai fafo, ma o le a manaomia se tupe mo a latou pasese ia ma isi tulaga e alu i le aumaia o i latou e galulue i totonu o le teritori.
I tulaga o masini, ua vaaia le siitia (77%) o le tupe talosagaina mo le tausaga fou. Mai lea faaopoopoga, pe a ma le $6.6 miliona e mo masini e fa’aaoga e fomai, $3.5 miliona e fa’aaoga mo gaseseina o taumafa, ma pe a ma le $8 miliona e mo le ICU.
I le vaega o pili uila ma le vai faapea fesootaiga, ua iai foi se faaopoopoga pe a ma le $856,000 ona o le poloketi foi lea ua faamoemoe e amataina i le tausaga tupe fou.
Sa saunoa Dr. Ledua, a tagai i tupe fa’aalu a le LBJ, e pe a ma le 70 pasene o le tupe, o lo o fa’aaluina lava aua auaunaga po o le tausiga, o le mamalu lautele, ae 30 pasene e mo tautua lagolago, ae o nei tupe uma, o lona auga lava i le fa’aaluina, e mo le tausiga o le soifua maloloina o tagata o le atunu’u.
Sa ta’ua foi e Dr. Ledua, e pe a ma le 70 pasene o tupe fa’aalu, e mai i le Medicaid ma le ARPA. Sa fa’amanino mai foi e Dr. Ledua, o se tasi o suiga tele i le latou paketi, o le tupe mai i malo, lea na $6 miliona, ae ua toe pa’u i le $1 milion, e pei ona sa iai muamua, ae o le $ miliona, lea ua sau mai i le ARPA, ma o le tupe lea e mo masini ma mea e fa’aaoga e faatino ai le galuega.
Ae na talosagaina e Dr. Ledua le fa’aagaga pea o le $4 miliona, atonu e iai se taimi o i luma o le a toe manaomia ai.
Ina ua tatalaina le avanoa mo ni fesili mai i sui faitulafono, sa fa’aalia e le afioga Senatoa Tuiasina Dr. Salamo Laumoli, lona fia malamalama i tiute o Dr. Akapusi, i le avea ai o ia ma Faatonusili o le falemai, toe galue o se fomai. Na fa’aalia e Tuiasina, i sona talitonuga, e le o o gatasi le totogi faatulagaina a le alii faatonusili/fomai ma le faatinoga o ona tiute.
Ua taofi le afioga i le Senatoa, i lona tagai iai i tiute ua tu’uina atu e faatinoina e Dr. Jean Anderson, o tiute uma ia e tatau ona faatino e le faatonusili, ona tulai mai ai lea o le fesili, po o a tiute o faataunuu e le faatonusili ua maualuga ai lona totogi, e pei ona talanoaina e tagata lautele ma sui faitulafono.
Na saunoa Tuiasina, i sona manatu, e sili atu le aoga o Dr. Ledua i tagata o Amerika Samoa, pe afai ae tumau o se fomai, aua o iina e mafai ona fa’aaogaina ai lona tomai faapitoa mo le tautuaina o le atunu’u.
Na fesiligia e le Peresetene o le Senate, le afioga Tuaolo Manaia Fruean le mafuaaga ua maualuga ai totogi o nisi o le aufaigaluega a le LBJ, ae le o ni fomai, nai lo fomai o lo o gafa ma le tautuaina o le soifua maloloina o le mamalu lautele.
Sa faatatau le saunoaga a le alii peresetene i le totogi a le ‘Chief Medical Doctor’ i totonu o le ER, lea e $102,000, ae e toalua ni tagata faigaluega se toalua, o lo o galulue i le potu talavai, e ta’i $144,000.
Sa le ‘au le manatu a le afioga Tuaolo i lea tulaga. Na ia saunoa e faapea, o lo o feagai fomai i totonu o le ER i aso uma ma le mamalu o le atunu’u, ae e leai ma seisi o i latou, seia vagana ai le ‘Chief Medical Doctor’, e au i se ta’i $100,000 o latou totogi. Na fesili Tuaolo, e le au i le 50,000 faitauga o tagata a le teritori, ae pe aisea e manaomia ai ni tagata faigaluega se toalua i totonu o le potu talavai e ta’i $144,000 o latou totogi i le tausaga.
Sa tali le faatonusili a le LBJ, o lo o latou galulue nei i le toe faatulagaina o totogi a fomai ma, ina ia mafai ona siitia i tulaga tatau. I le tulaga i tagata faigaluega i totonu o le potu talavai, na saunoa Dr. Ledua, sa faafaigata ona maua mai ni tagata faigaluega agava’a mo le potu talavai, ma o totogi ia ua leva ona iai i le taimi na o latou tutulai mai ai i tofi taitai. Ae ua mae’a ona tu’uina atu lenei mataupu i le komiti faafoe mo sa latou faaiuga.
Sa fautuaina e le afioga Tuaolo ia le faatonusili a le LBJ, a aunoa ma fomai, e leai se galuega e mafai ona faatinoina i le falemai. O le mea lea, e ao ona fai faalelei muamua fomai. Sa ta’ua foi e le susuga i le Peresetene o le Senate, e le fetaui i lana tagatagai le sili atu o totogi a tagata faigaluega e le o ni fomai, nai lo fomai.
I le saunoaga a le afioga i le Faipule ia Luaitaua Gene Pan, sa ia talanoaina ai tagata faigaluega o lo o pito i lalo o le faatulagaga o totogi a le falemai. Na ia fesiligia le alii faatonusili ma le pulega a le LBJ, pe ua o latou tagai i tagata ia o lo o faatinoina galuega ‘palapala’ i totonu o le falemai, i latou o lo o galulue i le leva o le po ma le vaveao, mo le tausiga o a latou aiga. Sa faatatau le saunoaga a Luaitaua ia i latou o lo o fesoasoani i tausimai, o leoleo po, o le au teu fale, o le au faamama fale, ma latou o lo o gafa ma le faamamaina o lavalava ma mea o lo o fa’aaogaina i totonu o le falemai.
Na saunoa Luaitaua, o tagata nei, e feagai ma le tele o siama, o vairusi ma so’o se tulaga e ono afaina ai lo latou soifua maloloina, a’o faatinoina o latou tiute. Ma ia fesiligia, pe le tatau ona iai se auala e mafai ai ona talafeagai o latou totogi ma ituaiga galuega o lo o latou faatinoina. Ma po o faataunuuina foi ni aoaoga mo nei tagata faigaluega. Na fesili le afioga i le Faipule, “Ua le agava’a ea nei tagata mo se si’i i o latou totogi, pe $10 pe $20 foi? Ua toatele atu Pule i totonu o le tou Paketi ae leai ni Tautua.”
I le saunoaga a le afioga i le Faipule ia Larry Sanitoa, sa ia fa’aalia ai lona le mautonu i le auala o lo o fa’aaogaina ai tupe a le ARPA ma i sona talitonuga, e o’o atu i le tausaga fou, ua le toe iai se tupe i le ARPA.
Mo se fa’ataitaiga, sa ia ta’ua ai le taimi muamua na faaoo mai ai le paketi a le LBJ, e $192,000 le totogi a le CFO ma o lo o galue faakonakarate, ae o lea ua toe aumai le paketi, ua pa’u i le $150,000 ae ua tagata faigaluega tumau. Na toe faamanatu mai foi e Sanitoa se fa’aaliga mai i le taitaifono a le komiti faafoe a le LBJ, na ta’ua ai e faapea, i tua atu o Oketopa 1, 2023, o le a faigaluega faakonakarate le CFO.
Ma ina ua fesiligia e Sanitoai a Dr. Ledua pe o faigaluega faakonakarate le CFO pe ua galue tumau, sa tali Dr. Ledua, o lea ua galue tumau ae o le tausaga fou, o le a faakonakarate ai. O lea na fesiligia ai e Sanitoa pe na faapefea ona o latou faafaigaluega tumau le CFO, ae e tatau ona galue faakonakarate, ae o lea foi ua si’i lona totogi.
Na saunoa le afioga i le Faipule, ua faatolu ai nei ona soalaupuleina le tupe faasoasoa a le LBJ, ae o lea e tupe i mea sese.
O le tulaga na fa’ate’ia ai le afioga i le Faipule ia Fetui Fetu Jr., o le tupe o lo o talosagaina mo femalagaiga i le tausaga tupe fou, lea na le i atoa se miliona i le tausaga tupe ua mavae, ae o lea ua talosagaina le $5 miliona mo le tausaga tupe fou.
Na tapa e le afioga Fetui se faamaninoga mai ia Dr. Jean Anderson. Ma sa saunoa Dr. Anderson ona o le tele o tausimai lea o le a aumai mai i atunu’u i fafo e galulue i le LBJ, faapea ma le aumaia o latou aiga, o le mafuaaga lea o le $5 miliona.
Na ta’ua e Dr. Anderson, o se tasi lenei o sini a le latou pulega, ia lava tagata faigaluega, e aofia ai fomai ma tausimai, e galulue i totonu o le falemai. Na folafola mai e Dr. Anderson, e o’o atu i le faaiuga o le tausaga fou, ua 50 ni tausimai o le a galulue i le falemai, e aofia ai ma se fomai faapitoa e galue i le potu faamama toto.
Na fesiligia e le afioga Senatoa Togiola Tulafono ia Dr. Anderson, i lona totogi mo lana galuega faakonakarate. Na tali Dr. Anderson, e $75 i le itula ma e pe a ma le 20 i le 25 itula i le vaiaso, o lo o galue ai nei mo le LBJ.
I le i’uga o lenei iloiloga, sa le i mafai ona talia e sui faitulafono ia le paketi faaulu a le LBJ ma o latou liliu ai i le Faatonusili o Paketi a le malo, ia Catherina Saelua mo sana fautuaga.
Sa fautuaina e Saelua ia le pasia e le Fono o le paketi mo le kuata muamua o le tausaga tupe 2024, ae ia toe ave isi kuata e toe faasa’o mai. Ae peitai, sa pasia e sui faitulafono i sa latou palota, le toe pasiaina o le paketi mai i le tausaga tupe 2023, ae ua toe tu’uina atu i taitai o le falemai se taimi faatulagaina, e toe faasa’o ma toe faaulu mai ai le latou paketi mo le tausaga tupe 2024.
