Pago Pago - AMERIKA SAMOA
O le Aso Tofi o le vaiaso ua tuanai, na tula’i i luma o le Faamasinoga Maualuga se alii faiaoga e suafa ia Senetenari, e tali i moliaga e 15 e faasaga ia te ia, i lona faia o ni uiga mataga i ni tamaitai aoga.
Sa faatonuina e le alii Faamasinoga le tumau ia Jon A. G. Clemens, ia sui o Vaega Faasalalau e latou te tu’ua le potu faamasino, ina ua faalauina le mataupu e faasaga ia Malele. E ui ina sa fesiligia e sui o Vaega Faasalalau ia le alii faamasino le tumau i le mafua’aga ua fa’atula’i’ese ai i latou, ae peitai, sa leai se faamatalaga na tu’uina mai, se’ia vagana ai le faatonuina o vaega fa’asalalau ina ia tu’umuli ese atu ma le potu faamasinoga.
O se taimi mulimuli ane, na maua ai e le Samoa News se faamatalaga e faapea, ua faasolofua e le faamasinoga lenei mataupu, ae o lo o matala pea le avanoa, e mafai ona toe failaina ai moliaga e faasaga ia Malele i seisi taimi.
E tusa ai ma faamaumauga a le faamasinoga, sa o’o atu se teineititi e i le vasega 7 a le aoga tulaga muamua i Pavaiai, ma lona tina, i le ofisa a leoleo i Tafuna, i le taeao o le 19 o Mati, ma failaina se tagi e faasaga i le alii faiaoga, ona o se faalavelave na tula’i mai i totonu o le aoga.
O lo’o tu’ua’ia ia Malele i lona tago i le teineititi i tulaga le talafeagai, i taimi o aoga.
O lo o ta’ua i totonu o faamaumauga a le faamasinoga e faapea, e foliga mai, na amata tupu lenei faalavelave i totonu o se potu aoga, ia Mati 13.
E tusa ai ma se ripoti a leoleo, o lo o ta’ua ai e faapea, na pu’e mai e le alii faiaoga ia le pui manava o le teineititi aoga ma toso atu agai ia te ia. Ma sa ia tago atu i le teineititi aoga i se tulaga le talafeagai ma ia fesiligia le teineititi pe mana’o e taofi. Ma sa ta’ua foi i faamaumauga a leoleo e faapea, ona o le fefe o le teineititi a’oga, ina ne’i a’afia ona maka i totonu o lana vasega, o lea sa ia le faia ai se tala.
O le faalavelave lona lua, e pei ona ta’ua I totonu o faamaumauga, sa tula’i mai i le aso 24 o Mati, lea na toe tupu ai lava le mea e tasi e pei ona tupu muamua. Ma o le aso lea na faamatala ai e le teineititi vasega 7 lenei, ia le mea na tupu ia te ia, i sana uo. Ae faamatala e lana uo, o le mea lava lea e tasi na tupu foi ia te ia, ma o le aso 27 o Mati, sa faamatala ai e le teineititi ia le mea na tupu, i se tasi o ana faiaoga, lea na ripotia loa lenei faalavelave i taitai o le a’oga.
O le afiafi lava lea ia Mati 27, na faamatala ai e le tina o le teineititi, le alu atu o sana tama teine matua ma ta’u atu ia te ia, e le o fia alu le uso laititi i le aoga ona e le lagona saogalemu ona o se tasi o ana faiaoga, ma o lea na mafua ai ona o’o atu le tina ma lona alo i le ofisa o leoleo.
O lo o ta’ua i ripoti a leoleo, o lo o masalomia pe a ma le to’a 6 fanau aoga o lo o a’afia i lenei mataupu.
O lo’o aofia foi I totonu o le ripoti ni faamatalaga mai nisi teineiti se toatolu, na faatalanoaina ma o latou matua, e tusa ai ma nei tu’uaiga.
O lo o aofia ai foi ma se faamatalaga a se tasi o teineiti e faapea, sa o latou vaaia ma nisi o le latou vasega ia mea sa tutupu I le teineititi mai i le vasega 7 lea na o ma lona tina i le ofisa a leoleo.
