Pago Pago - AMERIKA SAMOA
I se fa’aaliga mai i le Ofisa o Aoga a le Malo o Amerika Samoa, i le aso ananafi, mo taitai aoga uma o le teritori, ua faalauiloa mai ai le tapunia o aoga e amata atu i le aso, Aperila 24, 2023 se’ia o’o atu ia Me 12, 2023.
E tusa ai ma se imeli sa maua e le Samoa News i le aoauli ananafi, o lo o faapea ona talosagaina ai le Ofisa o Aoga a le malo ina ia galulue ma faailoa atu i faauluuluga o aoga uma ma o latou au ofisa, e tusa ai ma lenei fuafuaga, ma le toe amataina o aoaoga i luga o tekenolosi.
Ua ta’ua foi i lea imeli le iai o se fa’aaliga o lo o foufou mai, e faalauiloa faalauaitele ai le iai o Amerika Samoa i se tulaga o faalavelave faafuasei tau i le Soifua Maloloina.
O lo o ta’ua i lea imeli e faapea, o le a fa’aauau pea ona aga’i atu faiaoga ma aufaigaluega uma o aoga i a latou galuega i faleaoga, ae ia amata ona faamamalu tulaga o le puipuia o le soifua maloloina, e pei o le faia o puni fofoga, tu mamao ma le fa’aaogaina o vailaau e faamama ai lima.
Ua faapea foi ona taofia uma gaioiga ma polokalama a aoga, seia toe maua mai seisi fa’aaliga.
O le fa’aauau pea ona saunia taumafa a fanau aoga (School Lunch) ma o le a tufatufaina foi e pei ona sa faia e le DOE i vaitaimi o le Koviti.
Ma o le a fa’aaogaina pasi aoga e kiliva ai mea’ai a fanau aoga.
O lo o fa’aauau pea ona u’unaia e le Ofisa o le Soifua Maloloina ia matua, ina ia mafai ona faia uma tui puipuia a alo ma fanau, e pei ona iai se fa’aaliga faalauaitele a le Faatonusili o le DOH, le susuga Motusa T. Nua, lea na faalauiloa mai ai le tatalaina o nofoaga e faataunuuina ai tui puipuia o le Misela i falema’i a itumalo..
O le faaiuga o le vaiaso ua tuanai, na molimauina ai le iai o le aufaigaluega a le Ofisa o le Soifua Maloloina (DOH), i aoga uma o le teritori e faamautuina le faataunuuina o tui o le Misela a fanau aoga.
Se’ia vagana ai nofoaga tausia fanau iti (Daycare Centers) faapea ma le aoga maualuga ma le tulaga muamua a Kanana Fou, e leai seisi aoga na tapunia i le vaiaso ua mavae, talu ona salalau le fa’aaliga e uiga i le Misela i totonu o le teritori.
I se fa’asalalauga faalauaitele mai i le DOH i le vaiaso ua tuanai, sa u’unaia ai matua e le i mae’a ona faia tui o a latou fanau, e mafai ona fai a latou tui i aoga, I le va o le 8:30am ma le 10:00am, i le faaiuga o le vaiaso.
I sa latou fa’aaliga faalauaitele i le vaiaso ua tuanai, na fa’alauiloa mai ai e le DOH sa latou taumafaiga ina ia 100% le faia o tui puipuia mo le mamalu lautele.
