Pago Pago - AMERIKA SAMOA
FAAMANUIAGA TAU TUPE MO LE AU FAILA LAFOGA
Ua i luma nei o le Fono Faitulafono se tulafono na talosagaina e le faigamalo a Lemanu ma Talauega, e faatulafono ai le tuuina atu o tupe mai lafoga o totogi maua e tusa aima le Tulafono o Fuafuaga Lavea’i a Amerika o le 2021 i sitiseni ma tagata nofomau i Amerika Samoa.
O le vaiaso nei na faaulu ai i luma o le maota o sui lenei tulafono ma ua tuuina atu i le Komiti o le Sailiga o le Tamaoaiga o le malo mo le faatulagaina o se iloiloga.
E pei ona taua i le folasaga o le tulafono, o lenei tulafono o Fuafuaga Lavea’i a Amerika, sa faatulafono e le Konekeresi a Amerika i le aso 11 o Mati 2021, ma ua aiaia ai le tele o ala puna’oa mo le fesoasoani tau tupe mo tagata taitoatasi, o aiga atoa ai ma pisinisi.
O tagata taitoatasi e agavaa mo le tupe lea, e aofia ai sitiseni o le Iunaite Setete, o Nesionale o Amerika poo i latou na fananau i Amerika Samoa, o tagata mai fafo e nofomau i le teritori, poo se tagata foi e nofo i le teritori e i ai ona pepa faigaluega ma le numera saogalemu, o lo o agavaa foi faaletulafono lona aumau i le teritori ma faigaluega ai.
Tau ai o le auala o lo o i ai le fausiaina o tulafono tau lafoga i Amerika Samoa, ua manaomia ai se suiga i le tulafono ina ia mafai ai ona faagaioia ai aiaiga e pei ona tuuina mai i lenei pili tau faaofi ina ia agavaa ai tagata i Amerika Samoa.
Ina ia aloaia ma agavaa tagata o lo o aumau i Amerika Samoa i lenei tulafono, e tatau ona aloaia ma pasia e le Fono Faitulafono lenei pili, ona sainia lea e le Kovana ma aloaia loa le avea ma tulafono.
E pei ona aiaia i le tulafono e faapea, o tagata taitoatasi e agavaa i lenei tulafono e pei o tamaiti agavaa, o le aofai o le tupe e totogi atu e $10,641, ma le aofai o le tupe faaiuiu e totogi atu e $21,280;
O tagata taitoatasi e agavaa e i ai tamaiti agavaa pe sili atu foi tamaiti e agavaa, e totogi atu i ai le tupe e tusa ma le $14,949, poo le aofai o le tupe faaiuiu e $29,896.
O tagata taitoatasi e agavaa pe leai foi ni tamaiti agavaa, o le tupe e totogi atu e $9,814, poo le aofai o le tupe faaiuiu e totogi atu e tusa ma le $19,926.
O le taeao ananafi na pasia ai e le Maota o Sui le pili a le Senate mo lenei tulafono i lona faitauga faatolu, i le palota e 16-0.
O le faaiuga e pasia ai lenei tulafono, na faia lea ina ua maea se iloiloiga na faatautaia e le Komiti o le Sailiga o le Tamaoaiga o le malo a le Maota o Sui, lea sa fesiligia ai sui mai le Ofisa o Lafoga a le malo e faatatau i lenei mataupu.
Na taua e molimau mai le Ofisa o Lafoga a le malo e faapea, o lenei faamanuiga, o lo o fuafua e totogi atu i tagata totogi lafoga i le faaiuga o le masina o Setema, fuafua lava i le taimi e pasia ai e le Fono Faitulafono lenei tulafono ma sainia e le ali’i Kovana.
Saunoa le Sui Fofoga Fetalai, afioga Fetu Fetui Jr e faapea, o se tasi lenei o faamanuiaga tupe o le a maua e tagata o le atunu’u, e fesoasoani ai i le atina’eina o latou aiga atoa ai ma le tausiga o fanau.
O le faamoemoe e pei ona faanaunau i ai le faigamalo e pei ona saunoa Fetu, ia faaauau pea ona faatino auaunaga mo le manuia o tagata lautele, faatasi ai ma faamanuiaga tau tupe e sasa’a mai e le malo tele ia Amerika Samoa.
TOFIA LE ALII LOIA IA DAVID VARGAS AVEA MA LOIA FAUTUA
Ua i luma nei o le Fono Faitulafono tofiga a le afioga i le ali’i Kovana ia Lemanu Peleti Sialega Mauga, mo le filifilia o le alii Loia ia David Vargas e avea ma Loia Fautua mo tagata lautele, e sui tulaga ai i le alii Loia Fautua ua faamavae, susuga Michael White.
Na taua e Lemanu i lana tusi i le Fofoga Fetalai o le Maota o Sui, afioga Savali Talavou Ale e faapea, o le alii loia ia Vargas, o se loia ua silafia e le to’atele, ua tele fo’i tausaga o lana auaunaga i Amerika Samoa talu mai le 1995.
Mai tausaga e tele o le auaunaga a Vargas i Amerika Samoa, e 2 tausaga sa avea ai o ia ma loia fautua lagolago mo le lautele.
O le masina o Iulai o le tausaga nei, na tofia ai loa Vargas e avea ma loia fautua le tumau e faatalitali ai le taimi e aloaia ma pasia ai o ia e le Fono Faitulafono. E 90 aso le umi o lea tofiga sa tuuina atu ia Vargas e faatalitali ai le taimi e faamaonia ai o ia, ma o lea 90 aso e tatau ona mae’a i le masina o Oketopa o le tausaga nei.
Na taua e le afioga a Lemanu lona matua talitonuina o Vargas i lenei galuega, faavae mai lea i luga o lona agavaa ma le tomai ua ia te ia.
O le taeao o le aso Lua o le vaiaso fou i le itula e 8:00 ua faatulaga e faia ai le iloiloga e faamaonia ai tofiga a le Kovana mo le susuga a Vargas i luma o le Komiti o le Faagaioiga o le malo a le Maota o Sui, i lalo o le taitaiga a le afioga i le alii Faipule ia Faimealelei Anthony Fu’e Allen o le ta’ita’i komiti.
E pei ona silafia e le atunu’u, o le masina o Me o le tausaga nei na faamavae mai ai le alii sa avea ma Loia Fautua mai lona tofiga, le susuga a Michael White, i le mae’a ai lea o tausaga e 11 o lana auaunaga.
O le faamavae mai ai o White mai lona tofiga, na tula’i mai ai loa le leai o se Loia Fautua mo Amerika Samoa. Ae o le itu na sili ai ona pagatia, o le leai lea o se Loia na te tauaveina mataupu a i latou o lo o molia i luma o le Fa’amasinoga.
O le faamavae ese mai ai o White mai lona tofiga, na poloaina ai loa e le Fa’amasinoga o ia ina ia tula’i i luma o le Fa’amasinoga mo se iloiloga faapitoa, e iloilo ai pe faamata ua ia faatamala e faatino ona tiute faa loia na tofia ai o ia e le Fa’amasinoga.
O le mae’a ai o le iloiloga sa faatautaia a le afioga i le alii Faamasino ia Elvis P. Patea, na faamaonia ai loa le faamatala o White e tauave ona tiute i lalo o le tulafono, ma nofovaavaaia ai loa o ia mo le tausaga atoa i lalo o ni tuutuuga faapitoa e tatau ona ia usita’i i ai.
O ia tuutuuga e aofia ai lona tauaveina o mataupu a tagata sa molia sa ia sainia a latou maliliega aufaatasi ma le malo.
Na faailoa e White i luma o le Fa’amasinoga i le taimi o lana iloiloga faapitoa, na mafua ona ia faamavae mai lona tulaga, ona ua le mafai ona ia tauaveina le galuega na o ia.
Sa ia taua le tele naua o mataupu sa ia tauaveina, ae na o ia lava le loia sa galue mo le Ofisa o le Loia Fautua. O nisi o itu sa ave i ai lana faamuamua, e le gata o lona soifua maloloina, ae faapea fo’i le tausiga o lona afafine e 6 tausaga le matua.
PASIA E FAIPULE TOFIGA A LE KOVANA MO FAAMASINO U. GALOIA
E 15-0 le palota na pasia ai e le maota o sui i le vaiaso nei tofiga a le afioga i le alii Kovana mo le susuga a Faamasino Upuese Galoaia, e avea ai o ia ma Faatonusili o le Ofisa Suesue ma Galuega Lavea’i mo Amerika Samoa.
Na taua e Lemanu Peleti Sialega Mauga i lana tusi i le afioga i le Fofoga Fetalai o le Maota o Sui ia Savali Talavou Ale e faapea, o tausaga sa tautua ai Faamasino i vaega ‘au a le malo tele i le Militeli, o lo o laualuga ai lona tomai faataitasi, sogasoga ma le tofa fetuutuuna’i e faia ai soo se faaiuga tatau mo le manuia o tagata uma sa i lalo o lana vaavaaiga.
I lana vaavaai faa Kovana, o lo o tumau pea le fa’aauau e Faamasino o ia tulaga uma talu mai le taimi na galue ai mo le malo o Amerika Samoa i ni nai masina e lei mamao atu. O lona soifuaga ma lona tomai ua talafeagai lea e fai ai o ia ma Faatonusili o lenei matagaluega taua a le malo.
I le iloiloga sa faia mo le susuga a Faamasino i luma o le Komiti o le Puipuiga o le Saogalemu Lautele a le Maota o Sui i le vaiaso nei, na faafetaia ai e nisi o Faipule le tautua a le susuga a Faamasino mo vaega ‘au a le malo tele.
O nisi o fautuaga sa tuuina atu mo Faamasino, e aofia ai le faia o le galuega ma le alofa, mulimuli i le tulafono, ma ia aua nei faaitu’au. Sa fautuaina fo’i o ia ina ia fesili ia i latou ua loa la latou tautua i le galuega e maua ai se fesoasoani mo ia.
