E faatalofa atu I le mamalu o le tatou au faitau nusipepa I lenei taeao fou. Tatou te viia faatasi le agalelei ma le alofa o le Tapaau I le Lagi ona o Lana pule faasoifua ua tatou aulia mai ai lenei aso fou I le lagi e mama ma le soifua maua.
Ae se’e maia I ou seetaga malu ma uumau lau nusipepa, o lea o le a amataina le tatou FAGOGO fou lea ua faaulutalaina o le ‘I LE TU LUA O PO MA AO”.
*********************************************
Sa tau le iloa atu foliga o le tamaitai faaipoipo ua maliu, I le pisipisia o lona veli I lona toto. O se tamaitai e foliga mai sa lalelei, a’o soifua o ia. Na taatia I ona tafatafa se la’au e foliga mai na fa’aaogaina e faao’o ai le oti I si nei mafine.
Na aga’I atu le alii leoleo su’esu’e o Tavita Ioanetone ma tootuli i tafatafa o le tino maliu. Sa tau lana vaai I le ula lanu moana sa I le ua o le tamaitai ua maliu, faapea ma tautaliga lanu moana i ona taliga. I tafatafa o lima o le mafine, na taatia ai se uati, ua ta’e le tioata, ma ua pe le uati I le ta tonu o le sefulu lua I le tulua o po ma ao. Na tilotilo le alii leoleo su’esu’e I lana lava uati, ua sefulu minute e te’a ai le lua.
A'o faasolo pea le vaavaai a Tavita I le tino maliu, sa tau ai lana vaai I se pine lapo’a I luma o le ofu o le ua maliu, I luga tonu o lona fatafata. Na aapa atu Tavita ma ia liliu le pine ma ia vaaia se tama’I ata, o pipii I tua o le pine. O le ata o se tamaitai o lo’o la’ei I ona laei faaipoipo lanu pa’epa’e, atoa ma lona veli lanu pa’epa’e. O le matua o le tamaitai I totonu o le ata, e foliga mai e I le va o le 18 ma le 19 tausaga. Na maitau e Tavita foliga faanoanoa o le tamaitai I totonu o le ata, e pei o se tagata e le o atoatoa lona fiafia a'o loma lona faaipoipoga. I lalo ifo o le ata, sa pipi’I ai ni lauulu lanu auro, e foliga e mai I le ulu o se tamaitai.
Na umi se taimi o pula toto’a Tavita I le ata I lona lima. Ina ua mae’a, ona ia toe tago lea toe tu’u le pine I luga o le fatafata o le tamaitai ua maliu.
Na tula’I le alii leoleo su’esu’e ma amata ona ia faasolo lana vaai I totonu o le potu. Sa ia maitauina le gasu o le potu e pein a aga ai se afa malosi. O le laulau tele sa I le ogatotonu o le potu, ua u aga’I I lalo le vaega mafolafola o le laulau ae u I luga vae o le laulau. O ni pusa toso sa pipii I le laulau, ua matala uma ma sa agai atu Tavita ma faasolo ona lima I luga o nei pusa toso.
Ina ua mae’a suesuega a Tavita, sa ia agai atu loa I le fogafale lona lua o le fale, I le mea o iai le potu moe o le tamaitai ua maliu. Na leai se vaega o le potu moe sa le’I o’o iai suesuega ma le tilotilo a Tavita. Sa fa’aalia lona le fiafia ona e le’I maua le mea o lo’o ia tau sailia.
Na toe agai mai I lalo I le fogafale muamua ia Tavita ma fa’aauau lana suesuega I le umukuka ae peita;I sa le’I faamanuiaina ana suesuega. Ae o lona aga’I atu I fafo, na tau ai lana vaai I se laulau I totonu o seisi potu nofonofo o le fale. Ma ia faataalise atu loa iai.
O le mea o lo’o tau saili e Tavita, o le tusi o le soifuaga (Diary) a le tamaitai lea ua maliu. Sa le’I faamanuiaina sailiga a Tavita ae sa ia tau I se fasi pepa o iai se lisi o suafa o ni tagata ma nofoaga e alala ai. I le pito I luga o le pepa, o tusia ai le aso ananafi ma upu – 9:00.
Na fai sina umi o tu Tavita ma tilotilo le fasi pepa sa ia umia, ma ia manatu ai faapea, atonu o le lisi lenei o tagata na I totonu o le fale anapo I le 9:00. O se tasi o igoa o lo’o vasevase tetele ai se laina. Na sioa Tavita I le igoa lea ma ia faapea ifo, “ou te iloa le tagata lea”.
O le igoa o lo o sioa iai Tavita, o le igoa o le tamaitai o Tepora Uatisone. Na ataata lemu Tavita a’o ia taumafai ina ia teu fatu lenei igoa, ma ia aua ne’I toe faagaloina.
E FAIA PEA
