Ads by Google Ads by Google
Pago Pago - AMERIKA SAMOA
E tusa ai ma tu ma aganuu a Samoa, ua filifilia ai e ta’ita’i ma matai o le Itumalo o Fofo le afioga ia Olo Ulualo Letuli e avea ma senatoa o lo latou itumalo, e suia le afioga ia Fai’ivae Iuli Godinet sa fa’amavae i le tofi senatoa i le masina ua te’a, mo le tofiga fou o le Kovana Itumalo Falelima i Sisifo.
O le faaiuga a le Itumalo o Fofo na taua i le tusi i le aso 13 Iuni mai le Failautusi o Mataupu Tau Samoa ia Mauga Tasi Asuega sa tuuina atu i le Peresetene o le Senate ia Tuaolo Manaia Fruean, lea na logoina “i’uga o le tofi Senatoa o Fofo, Itumalo Numera 11.
Fai mai Mauga, o sui o Fofo, “e tusa ai ma tu ma aganuu a Samoa, na filifilia ai Olo Uluao Letul. O le pepa o le filifiliga na sainia e fa’alupega o Fofo sa tuuina atu i le Peresitene o le Senate.
O le a nofoia e Olo le nofoa senatoa mo Fofo i le taimi e tauaofia ai le Fono i le aso 10 Iulai mo le Fono Tele lona lua a le Fono Faitulafono lona 38.
O tulafono o lo’o i ai nei, e mana’omia ai le filifilia o senatoa e tusa ai ma tu ma aga fa’aSamoa e fono a itumalo o le itumalo po’o itumalo e fai ma sui.
O le isi aiaiga o le tulafono o lo o taua ai e faapea o le tagata e filifilia e faatumu se avanoa e tatau ona umia le tofi i le taimi o totoe o le nofoaiga a lē na muamua atu ia te ia.
O le Fono Faitulafono lona 38 o lo’o i ai nei e fa’ai’u aloa’ia ia Ianuari 03, 2025 – pe a fa’atoto le Fono Faitulafono fou i le mae’a ai o le faiga-palota tele ia Novema 2024.
