Pago Pago - AMERIKA SAMOA
Na molimau le faatonusili o le Ofisa o Faatoaga, le susuga Solialealofiotagaloa I.T. Mutini i luma o le komiti o faatoaga a le Senate i le Aso Faraile, Me 31, 2023, o lo o tumau pea le le lava o fuamoa o lo o faatauina i faleoloa a le teritori, talu mai lava le tapunia o alava’a ona o le Koviti-19, aemaise ai, e na o le tasi le faatoaga fuamoa a le teritori.
Na faamanino atili e le susuga Solialealofiotagaloa, na mafai ona maua se avanoa e a’apa atu ai i le motu tuaoi o Samoa mo se fesoasoani, ona o le maliliega lea sa faia i le ‘Atoa o Samoa’. Ma sa ta’ua foi e Muti Solialealofiotagaloa, e ui ua maua mai le faatanaga mai i le ofisa o faatoaga a le malo feterale (USDA) e faaulufale mai ai fuamoa mai Samoa mo le fa’aaoga e aiga po o tagata taitoasi, e leai se faatanaga ua tu’uina mai e mafai ai ona oka mai e kamupani po o pisinisi, ia fuamoa mai Samoa.
E alia’e le mataupu i fuamoa mai Samoa i le amataga o le tausaga – ona o le tele o faasea i le faaaogaina o aseti a le Malo o Amerika, e aofia ai ma taavale, e kiliva ai fuamoa I pisinisi eseese, o lo o i atunuu i fafo ia le susuga Solialealofiotagaloa, e pei ona sa faaleoina e afioga Senatoa ia le faaulufaleina mai o fuamoa mai Samoa e aunoa ma se faatanaga tatau mai i le USDA, aua le fofoga taumafa o le atunuu.
Ua taofia nei le toe faaulufaleina mai o fuamoa mai Samoa, e pei ona sa faamaonia e le susuga i le faatonusili i luma o Senatoa i le latou iloiloga i le faaiuga o le masina ua tuanai
Sa ta’ua e le susuga Solialealofiotagaloa, o le taimi nei, afai ae le saofia mai va’a oloa i le masina, lea o lo o aumai ai taumafa, e aofia ai fuamoa, ona lagona lea o faasea mai i tagata o le atunuu. Ae peitai, ona o le latalata mai o le motu tuaoi o Samoa, e faafaigofie ona maua mai ai se fesoasoani.
O se tasi o mataupu taua na faasoa atu e le susuga Solialealofiotagaloa i afioga Senatoa, o le umi e lelei ai fuamoa, e i le va o le 3 ma le 5 vaiaso, afai ae tuai mai va’a oloa, e o’o mai fuamoa i le teritori, ua le toe lelei fuamoa. Ma o nisi nei o mataupu na sualaupuleina i le fono a Malo e Lua, le Atoa o Samoa lea sa faataunu’uina, lea na faatagaina ai le aumai o fuamoa mai i Samoa, aua e na o le 8 itula e aumai ai i le va’a lalo mai Apia.
Na faamatala e le susuga Solialealofiotagaloa, e pe faafa pe faalima ona ia malaga atu i Samoa, ae e le’i amata ona la’u mai fuamoa, ma o le amataga o lea fuafuaga, ina ia faamautu ai le sefe o le auina mai o fuamoa mai Samoa. Sa mafai ona faamaonia le sefe o le fa’aaogaina o fuamoa mai Samoa mo le fofoga taumafa a le atunuu.
Ae e le’i amataina le iloiloga a le Senate, na faailoa atu e le susuga Solialealofiotagaloa i afioga Senatoa, o le samania o ia, e mo le talanoaina lea o mataupu tau faatoaga, e leai se tulaga na ta’ua ai le talanoaina o fuamoa mai Samoa. Ae peitai, sa ia fia faamaninoina lea mataupu taua, ma sa ia faaoo atu foi se faatoesega i sui o le maota maualuga, ona o le faafitauli na tula’i mai ona o lea mataupu.
Na faapea foi ona faasoa atu le susuga i le faatonusili e tusa ai ma alagatupe fesoasoani mo le ofisa o faatoaga, lea na taua e le susuga Solialealofiotagaloa, e mo le totogiina o tagata faigaluega, ae le mo faifaatoaga. Sa ia toe faamanatu atu foi i sui o le maota maualuga, na faalua ona ia o’o atu i luma o le Fono mo le soalaupuleina o le paketi faaletausaga, ma na talanoaina ai foi lea lava mataupu e tasi.
Na faailoa atu e le afioga i le Senatoa Magalei Logovi’i – o se faifaatoaga foi – I le komiti o le Senate, e faapea, o lenei vaegatupe o lo o faasoasoaina mai e le Ofisa o le Kovana, i lalo o Polokalama Faapitoa.
O lea na fautuaina ai e le susuga Magalei ia le Komiti o Paketi a le Senate, e faapea, ona o lea ua fa’aaogaina lea vaegatupe e totogi ai tagata faigaluega a le ofisa o Faatoaga, e mafai ona latou soalaupuleina lenei mataupu aua le iloiloga o le paketi fou.
Na toe faamamafa atu e Magalei e faapea, o lea alagatupe e fesoasoani i faifaatoaga, e ala lea i le totogiina o tagata faigaluega o le Ofisa o Faatoaga ma o se mataupu e tatau ona iloiloina e le Senate.
I totonu o le Paketi mo le tausaga galue o le 2023, e $100,000 ua faagaga mo Polokalama tau Faatoaga ma le Saogalemu o Taumafa.
