Pago Pago - AMERIKA SAMOA
O lo ua fa’ailoa mai i le fa’aiuga o le toe masina o le tausaga 2022, o lo ua fa’atulaga le faatautoga o le afioga le Senatoa Tuaisina Dr. Salamoa Laumoli e fa’ataunuuina i le aso, Ianuari 3, 2023 I le 11:00 I le taeao. E muamua ona fa’atino lea fa’atautoga a’o le’i amatalia le fa’atautoga o Sui Faipule uma lava ua filifilia mai e ala i le palotaga o Novema 8, 2022 mo latou itumalo ta’itasi.
O le afioga Senatoa Tuiasina Dr Salamo Laumoli o le a fa’aauauina le nofoaiga a le afioga Satele Galu Satele lea ua fa’ilagi le soifua, i le fa’aiuga o le tausaga ua tuana’i.
O le afioga Senatoa Laumoli sa faai’uina ona faiva sa galue mai ai i tausaga e tele, a’o avea o ia ma Foma’i Sili i le Falema’i Fa’aitumalo i Leone, mo le matagaluega o le Soifua Maloloina ia Tesema 30, 2022. I lana lea tautua, sa avea fo’i o ia ma Fa’atonusili o le Matagaluega o le Soifua Maloloina ma o se Foma’i Nifo sili fo’i i le Fale Fa’i Nifo a le tatou Falema’i tele LBJ Medical Center i Faga’alu.
A’o lei mua’i fa’amautuina lona tofiga o le Senatoa e sui tulaga ma fa’ai’uina le nofoaiga a Senatoa Satele Galu Satele ua maliu, sa mua’i fa’auia uma ona fa’amaumauga e tusa o lana tautua i le atunuu, itumalo, afio’aga ma le Ekalesia ae maise fo’i o ona tomai ma a’oa’oga fa’apitoa ua mae’a fa’aauupegaina ai lana afioga e le Peresetene o le Maota Maualuga, ina ia toe iloilo toto’a lava le filifiliga a le Itumalo poo faia e tusa ai ma aiaiga taoto fa’aletulafono a le Malo o Amerika Samoa.
Ua aofia i nei aiaiga uma, o se tusitusiga aloaia a le afioga le Kovana Sili e fa’amauina ai le avanoa o le nofoa o le itumalo, fa’atasi ma le tusi fa’ailo mai le itumalo e fa’amautinoa ai lona filifilia a’ia’i mai le fonotaga a ali’i sili ma tulafale o fofoga o le itumalo Tualatai,
O le itula e 12:00 o le aso, lea ua faatulaga ai le fa’atautoga o le mamalu o Faipule Filifilia ma Senatoa Tofia mo latou itumalo mo le nofoaiga lona 38 o le fono faitulafono a le Malo o Amerika Samoa.
Ua fa’ailoa mai o le fa’atautoga o Sui Faipule uma lava o le Maota o Sui o le a fa’atautaia lava lea i le I le Nofoaga sa fa’atautaia ai pea latou fonotaga mo le nofoaiga lona 37 ua tuana’i a le fono faitulafono, Lee Auditorium i Utulei. O le Senate o le a fa’ataunuu lava le latou fa’atautoga i le Maota Fono i Fagatogo.
O le a filifilia fo’i le Fofoga Fetalai o le Maota i le taeao lava nei foi. O lo ua i ai fo’i le avanoa e fa’atulaga ai se toe filifiliga o se Peresetene o le Maota Maualuga i le mae’a ai o le fa’atautoga o afioga i Senatoa o le Maota Maualuga i lea lava aso
