Pago Pago - AMERIKA SAMOA
Ua “fa’amaonia aloaia” e le Komesina o Palotaga, Uiagalelei Lealofi, sui tauva mo le faiga palota ia Novema 8, 2022, ina ua mae’a le aso e tu’u atu ai se lu’i fa’asaga i sui tauva i le itula e 4:30 i le afiafi o Setema 07.
I le mae’a ai o le fa’amaoniaina o sui tauva, ua fa’alauiloa ai fo’i e Uiagalelei le amatalia o palota “absentee” - mo le loto i fale ma i latou e alaala i fafo atu o Amerika Samoa, aua ua ma’ea ona lomia pepa palota.
SUI TAUVA FA’AMONIA
Ina ua fesiligia e le Samoa News, sa tali mai Uiagalelei e faapea, e “leai ni lu’i” na faila faasaga i sui tauva o lo o tauva mo tofi o le malo ia Novema aso 8.
Ma o lea ua faamaonia ai sui faatutu uma na lisiina o latou igoa ma fa’amatuu atu e avea ma sui agavaa i le te’a o le 4:30pm i le aso 1 o Setema.
Mo le faipule o Amerika Samoa i le Maota o Sui o Amerika, o le tamaitai faipule o Uifa’atali Amata - o loo tumau pea le fa’aaogaina o le suafa “Aumua Amata” i luga o le palota - o loo tauva e aunoa ma se tetee.
I le tulaga o le a le Maota o Sui o le Fono Faitulafono a Amerika Samoa, e toalima faipule o lo o tauva e aunoa ma se isi e tetee ma o lea ua mautinoa e toe foi mai ia Ianuari 03, 2023 pe a faatautoina sui o le maota i le itula e 12 i le aoauli o le aso lava lea, mo le tauaofiaga Fono Faitulafono lona 38.
O faipule nei e to’alima: Luaitaua Gene Pan mo le Sui Itumalo #5 – Sua #1; Avagafono, Tuavao Vaimaga Maiava mo le Sui Itumalo #6 – Sua #2; Vailoata Eteuati Amituana’i mo le Sui Itumalo #7 – Maoputasi #1; Vesiai Poyer S. Samuelu mo le Sui Itumalo #9 – Maoputasi #3; ma Ape Mike Asifoa mo le Itumalo #17 – Leasina.
Ona pau lea o le faipule e le o toe sailia le tofi, o le sui faipule o Vaetasi Tuumolimoli S. Moliga mo le Itumalo #10-Maoputasi #4. E to’alua sui fa’amaonia o lo o tauva mo le nofoa o lenei itumalo.
O lo o i ai nisi o sui tauva tamaitai mo lenei tausaga palota e aofia ai le faipule o Andra T. Samoa mo le Itumalo #13 – Fofo, ma o loo feagai ai ma se tasi o lu’itau, o Fiu John Saelua – sa avea ma Pule Sili o le aufaigaluega a le Kovana i le 8 tausaga o le nofoaiga a Kovana Lolo Matalasi Moliga.
O le lisi o sui tauva mo lenei tausaga palota o lo’o lomia atu i le tala tusia i le gagana peretania a le Samoa News ia Setema 06, 2022 i le upega tafailagi (www.samoanews.com).
Mo fesili i le fa'amaoniaina o sui tauva ma le lisi, vili le Ofisa Palota ile 699-3570.
PALOTA “ABSENTEE” LOTOIFALE
E tusa ai ma tulafono o faigapalota a le atunu’u, na taua ai e Uiagalelei e fa’apea, o tagata palota ua agava’a o lo o aumau i Amerika Samoa, ae o le a toesea mo se taimi le tumau i le teritori i le aso o le Palota, “e mafai ona palota”, absentee lotoifale i le Ofisa o Palota i Tafuna.
Ma e na'o tagata palota agavaa nei e mafai ona palota i le lotoifale e ala i le “absentee” a'o le'i malaga i le va o le taimi nei ma seia oo i le aso a'o lumana'i le Aso Palota:
• i latou e malaga mo togafitiga faafomai po’o gasegase;
• malaga mo tofiga fa'afitafita;
• malaga mo a'oa'oga e feso'ota'i ma galuega, fonotaga po'o tofiga;
• malaga mo tafaoga.
Saunoa Uiagalelei e fa’apea, o i latou nei o lo o fia palota, e tatau ona latou tu’uina atu fa’amaoniga o lo latou toesea le tumau mai le teritori ia tusa ai ma ta’iala a le atunu’u, i lalo o le Tulafono Fa’afoe (Administrative Code) a Amerika Samoa.
O ia fa'amaoniga e aofia ai, ae le fa'atapula'aina i: pepa malaaga i va'alele/va'a, fa'atonuga a le militeri, Fa'atagaga o Femalagaa'iga, fa'asinomaga fa'afoma'i, ma isi.
Na fa’amamafa e Uiagalelei e fa’apea, o i latou malaga e toe fo’i mai i Amerika Samoa a’o le’i o’o i le aso 8 o Novema, 2022, “e le toe fa’atagaina ona toe palota” - pe afai ua uma ona palota i latou e le auai i le atunu’u ae le’i malaga atu.
O le aso Tofi o le vaiaso ua te’a na amata ai le palota absentee a le au le auai i le lotoifale ma e oo atu i le aso 07 o Novema, mai le itula e 8 i le taeao i le 4pm, Aso Gafua i le Aso Faraile i le Ofisa o Faiga Palota, lea o le a tatalaina foi i Aso Toonai ma Aso malolo mai le 8 i le taeao. i le itula e 12 i le aoauli mo le palota a le abentee lotoifale.
PALOTA “ABSENTEE” MAI FAFO
Mo le palota “absentee” mo tagata Amerika Samoa mai fafo, e agava’a i lea palota, o le aso Tofi sa amata ai.
O i latou nei e aofia ai fanau a Amerika Samoa i le military ma isi o lo’o agava’a mai fafo, e aofia ai ma tagata faigaluega a le ASG ma fanau aoga o lo o aooga i aoga i fafo atu o Amerika Samoa.
Na amata ile aso 1 o Ianuari o le tausaga nei le faiga o talosaga mo i latou e agava’a i le palota absentee mai fafo. Ma e faia ia talosagaina i luga ole laiga ile www.aselectionoffice.gov upegatafa'ilagi.
Na ta’ua e Uiagalelei i le lua masina talu ai e faapea, o fanau a Amerika Samoa o lo’o tautua i le militeri mo tagata palota mai fafo—i fafo atu o le Iunaite Setete ma Teritori—e mafai foi ona faaaoga le Federal Post Card Application (FPCA) e talosagaina ai lau palota e le o auai.”
Ma o le aso e gata ai talosaga o le absentee mai fafo - mo i latou agava’a - o le aso 25 Oketopa.
