Pago Pago - AMERIKA SAMOA
O le aso Gafua sa alofaiva ai le Ofisa Autu o Fa’asao o le Gataifale i Amerika Samoa e fa’amanatuina le latou 10 tausaga talu ona fa’atuina, ae o le atoaga fo’i lea o le 50 tausaga o Fa’asao Eseese Uma i le Malo Tele.
O le polokalama fa’ataoto a le National Marine Sanctuary of American Samoa (NMSAS), mo le latou fa’amoemoe e fa’atautaia lea mo le vaiaso atoa lenei e o’o atu i le aso Faraile. Sa i ai valaaulia fa’apitoa i le aso Gafua, i le Tauese P.S. Sunia Ocean Center i Utulei.
Na saunoa fa’apitoa le lutena kovana, Talauega Eleasalo Ale ma ia fa’ailoa le aoga tele o nei fa’asao i le taumafaiga a Amerika Samoa ina ia fa’aleleia atili sosia tumau o le gataifale ae masie lava i le tele o I’a mo fagotaga, le fa’aleleia tumau o le gataifale mo maimoaga a i latou uma lava e fiafia e maulu ma maimoa i le matagofie tumau o tatou fa’asao.
“O nisi nei o mata’aga e fiafia i ai le mamalu o e fia ulufale mai ma asiasi e maimoa i tatou gataifale. Ua tatou iloa lelei fo’i, o tatou gataifale o se tasi lea o mea ua lalamua ai Amerika Samoa i le lalolagi ona o ona ‘amu o lo ua maimoaina e tele na’ua ituaiga eseese e le o toe va’aia i nisi lava ogasami i le lalolagi. Ua avea lo tatou gataifale fa’asao ma ala ua tumati’e ai fo’i le tatou terttori i le va’aiga lautele a isi setete ma teritori o le Malo tele. Fa’afetaia ai le galuega o lo’o feagai mai ma le tofa Atuatasi Lelei Peau ma le aufaigaluega atoa i le tatou nei Ofisa Autu o a tatou Fa’asao o le Gataifale.”
O lo ua iloga le aoga tele o lenei fa’atofala’iga ua sainia fa’atasi e le Malo Tele ma Amerika Samoa ina ia fa’avasega ma puipuimalu ai tatou gataifale, tausia lelei ma fa’asao le tele o sosia e aoga mo le lumana’i o le tatou atunuu, ma avea ma mata’aga i le to’atele o e asiasi mai i le atunuu.
Mo le polokalama i lea taeao, sa oo atu ai le A’oga a Manumalo Baptist Academy ma sa latou faaalia ata fa’asolo pupu’u fo’i o fa’asao uma i Amerika Samoa ma ona sosia matagofie ua oo lava i ata fa’asolo Katuni a le fanauiti o lo’o tuufa’atasia e le ali’i Suesue o le Gataifale lauiloa o Cousteau, ua maimoaina uma lava e fanau a’oga fa’apea ma malo fa’aaloalogia se’ia oo ina mae’a le altou polokalama fa’asolo mo le ulua’i aso ae sami i le aiga matagofie na tapena e fa’ailogaina ai le latou 10 tausaga.
O le mae’a ai o le ‘aiga fiafia ma sa taua’aoina fo’i le latou keke fa’apitoa mo le 10 tausaga, na toe fa’aauau ai asiasiga a nisi o a’oga na pa’au mulimuli atu e aofia ai le Fa’asao Marist High i le latou vasega 10, Samoana High i a latou vasega o le Biology 1 ma le Vasega o le General Science. O ata sa fa’asolo e faaaoga tele fo’i i le olaga o fanau talavou ina ia latou mautinoa, o le fa’afitauli numera muamua lava i le gataifale o le otaota o so’o se ituaiga e mafai ona tafea atu mai le laueleele i le sami, ma fa’aleagaina ai le ola maloloina o ‘amu ma a’ao o so’o se atunuu o le lalolagi. O mea ia e mafai e le tagata soifua ona taofia mai le fa’aleagaina ai o lea vaega taua o le Siomaga.
O isi mea ua fa’ailoa mai o loo afaina ai tele le lauolaola lelei o ‘amu ma a’au o le gataifale o fesuia’iga fa’afuase’i o le tau i le lalolagi. Ua so’ona vevela le La ma ua a’afia ai le olaga o meaola uma i le gataifale. Ua faapea fo’i ona siisii tele le o’ona o le suasami, ma ua fa’apena ona suia ai le lanu o le ‘amu sa tatau ona i ai. O nei mea e le mafai ona suia e le tagata, ae mafai ona silasila toto’a i le afuaga o nei mea uma ma taofia le toe faia e tagata uma, ma le so’ona manifinifi le ‘afu’afu o le lalolagi ma ua sao mai lava le so’ona vevela o ‘ave o le La i le lalolagi.
O lo’o manaia lava fe’au o lo’o aumaia e ata fa’asaolo katuni a le fanau, ma ua iloga le matagofie ona aumaia o nei fe’au taua i le tupulaga talavou o fanau ina ia tima’ia tupulaga mo le lumana’i.
O le isi a’oga sa auai o le Grace and Peace Academy i Malaeimi, lea ua mae’a a’o’oga ai le fanau ami le level K5 se’ia oo lava i vasega 8 i le taimi nei, ae ua i ai le fa’amoemoe e aga’i atu lava i le Level 12 nei fanau ma tatala ai lava le avanoa i fanau talavou mo. latou a’oa’oga i lea fo’i Laumua fou ua tatalaina.
O le Grace and Peace Academy o lo’o fa’atautaia lea e le Grace and Peace Fellowship o lo’o aofia ai Rodney and Fuafiva Va’a Chand o nisi o latou faia’oga. Sa pa’au mai nisi o latou faia’oga e aofia ai Valo Pulemau, Jubilee Flemming ma le aiga o Chands e avea ma sui e puepuemaua ni fa’amaumauga aoga tele mo le a’oa’oina o fanau i le latou a’oga, e iloa patino ai le aoga tele o Fa’asao o le Gataifale o Amerika Samoa.
O le polokalama fa’asolo mo le vaiaso atoa, ua fa’ailoa mai ai le fa’aauau i le aso ananafi na fa’atulaga ai fo’i nisi o asiasiga mai a’oga eseese i le motu e fia maimoaina lava le tele o tatou ata fa’asolo ua maea tapema e le aufaigaluega a le Tauese Pita Sunia Center e fa’amaimoaina ai le fanau talavou. O i latou nei e mafai ona faia le suiga lelei i le Siomaga o Mata’aga o le Gataifale pe a oo fo’i i vaitau e avea ai i latou ma tagata matutua ma fa’amoemoe i ai le malo mo fa’agasologa o galuega lelei mo le gataifale.
O le polokalama fa’ataoto lea mo le aso Lua e faia lava asiasiga ma faaalia ata nei e avea ma tima’iga mo tupulaga fai a’e o le atunuu, ia soo le fau ma le fau i le fa’amoemoe o le Fa’asao ma Mata’aga o le Gataifale o Amerika Samoa e fa’aauaua galuega lelei uma.
Aso Lulu ua se’e atu le polokalama ina ia fa’amanuia le galuega sa nafa ma le fanau e to’a 30 na fa’aaoga taina ai Paopao e Lua. O le a faia lea faamoemoe i le Malae o le Suigaula a le Atuvasa i Utulei ma ua soo taua’au ai le ASNMS ma le Asosi a Tautai o Amerika Samoa e fa’atino lea fa’amoemoe lelei. Ua fa’ailoa mai o le isi a latou pa’aga o le TAOA lea fo’i o le a latou fa’alauiloaina nisi o agaifanua a le Atunuu e afua mai le Gataifale.
O le a fa’atutu nofoaga e a’oa’oina ai le fanau o le a auai i le filiga o le afa aua le fausia o La o Va’a folau, Taina o mea faigaluega eseese e fa’aaogaina e tautai fagota ma isi tomai alofilima o le atunuu e ao ina agava’a ai le Tautai poo Ali’iva’a a’o le’i aga atu e folau pe fagota i le tai.
O le aso Tofi ua fa’atulaga e fa’aalia ai ata fa’asolo o le Gataifale Fa’asao o Amerika Samoa, lea ua logologoa fo’i le Lalolagi ae maise le Malo tele i lona matagofie o aofia i o tatou faasao o le gataifale i le taimi nei.
Peita’i o le aso Faraile o le a avea fo’i ma aso fiafia fa’atasi ai aiga i le tatou Ofisa autu o Fa’asao ma Mata’aga o le Gataifale o Amerika Samoa, ma o le a aoga atoa lea aso mo sui uma o Aiga o le a auai. E i ai ta’aloga mo le fanau, mea tausami ma nisi o mea e fa’atautaia e fa’afiafiaina ai uma tagata o le aiga atoa.
Aua ne’i misia e le mamalu lautele avanoa fa’apenei e mafai ona fa’aleleia atili ai le silafia ma le nofo mautinoa o le fanau i ala e fa’aleleia atili ai fa’asao ma mata’aga o le tatou atunuu, ae maise e tau taofiofia mai ai le fa’atalale i tulaga o fa’alapisi o so’o se ituaiga aua e mae’a ane lava, ua tele na’ua mea eseese ua ofaga atu i le gataifale, e ono lamatia ai le soifua lelei o meaola uma i le sami.
