Pago Pago - AMERIKA SAMOA
O sui mai le kampani a le Architects Hawaii Ltd (AHL) mai Honolulu, Hawaii sa feiloai ma le afioga i le kovana sili ia Lemanu P. S. Mauga i le aso 7 Iuni, 2023 e fa’atatau i le taimi e fa’atulaga ai le poloketi o le fausia o se falema’i fou i Tafuna.
I se pepa o fa’amatalaga mai le Ofisa o le Kovana sa taua ai e fa’apea i le taimi o le fonotaga sa fa’amanino atili e Kovana Lemanu lana va’aiga mo le Falema’i Fou.
“O se tasi o fa’afitauli tele i atumotu o le Pasefika o le le lava lea o alaga’oa mo le soifua maloloina, ua fa’amalosia ai o tatou gasegase e malaga atu i isi atunu’u e pei o Niu Sila, Ausetalia, ma Amerika mo a tatou foma’i uma na tu’uina atu,” o se tala lea a le kovana.
“O le manulauti o lenei nofoaga fou ia lava alagaoa ma ia faafaigaluegaina ni tagata tomai faapitoa e su'esu'e, togafitia, ma tausia o tatou tagata. O nei auaunaga o le a mafai ai foi ona avea Amerika Samoa ma tausi soifua maloloina i atumotu uma o le Pasefika,” o le saunoaga lea Lemanu.
Na taua e le Fa’atonu o le Poloketi a le AHL, Linda Lileikis, e fa’apea, o a latou su’esu’ega e fa’atatau i tagata ave i fafo mo togafitiga mai Amerika Samoa, e fa’atatau i le Cardiology, Orthopedic, Ophthalmology, Neurology and Oncology.
“Matou te le mana’o e fa’aluaina so’o se auaunaga o lo’o tu’uina atu e le LBJ; peita’i, o lo’o fuafua e tu’uina atu auaunaga fa’aopoopo e fa’atino ai vaega tetele e lima o lo’o fa’asino atu ai tagata o Amerika Samoa i togafitiga fa’afoma’i i fafo atu o le motu,” o le fa’aaliga lea a le Fa’atonu o le Poloketi, Lileikis.
Ua fautuaina e le afioga i le ali’i kovana ia Lemanu le AHL ina ia fa’anatinati fuafuaga fa’ai’u ma galulue fa’atasi ma le vaega a le atunu’u e amata fausia le falema’i.
O lenei falema’i fou o lo’o fuafua e fausia i Tafuna ma o le kamupani a le AHL ua fa’akonekarate e tusia le ata o le falema’i fou.
