Pago Pago - AMERIKA SAMOA
O le tala fa'atatau o tupe fa'aopoopo o le tausaga faaletupe 2023 a le faigamalo e sili atu i le $7.4 miliona, o lo’o fa'aagaaga ai le $1 miliona mo le Fono Faitulafono mo le Fa'amanatuina o lona 75 Tausaga.
O le Aso Lua na fa’aulufaleina ai le tulafono taufa’aofi i luma o le Senate ma tu’uina atu ai i le Komiti o le Paketi, lea na fa’alauiloa e le sui ta’ita’ifono, le afioga i le ali’i senatoa ia Magalei Logovi’i, le iloiloga a le komiti i le taeao ananafi e talanoaina ai lea mataupu e aunoa ma ni molimau mai le faigamalo.
O le vaiaso nei lea ua fa’amoemoe e fa’aulu lenei lava tulafono taufa’aofi i luma o le Maota o Sui, ma ma’ea logoina i se tusitusiga mai le Ofisa o le Kovana, afioga i faipule e fa’atatau i le vaega tupe fa’aopoopo mo le tausaga tupe 2023.
I le tatalaina o le Nofoaiga Lona 38 a le Fono Faitulafono i le Aso Gafua i le taimi o le fono soofaatasi, na saunoa ai le Peresetene o le Maota Maualuga ia Tuaolo Manaia Fruean - o ia na fofogaina le tali a le Fono i le saunoaga fa’apitoa a le kovana - e fa’apea o le tausaga lenei o le a faamanatuina ai 75 tausaga talu ona fa’avaeina le Fono.
Ma sa ia talosgaina le faigamalo mo se fesoasoani tau tupe e fesoasoani e fa'ailogaina lenei mata'ina i le talafaasolopito o le Fono.
E talitonu le Samoa News, ua mae’a ona amata fuafuaga mo le fa’amanatuina o lea fa’amomole a le Fono, peita’i e le’i maua mai ni fa’amatalaga po’o afea e fa’ataunu’u ai, ae ua fa’amoemoe e faia i se taimi o le taumafanafana.
O se tasi o tupe fa’atulaga i totonu o le tupe fa’aopoopo o le 2023 e aofia ai le $300,000 e fa’atupe ai le Aso o le Fu’a a Amerika Samoa, Aso o le Fu’a a Manu’a, Aso o le Fu’a a Swains Island ma le Vaiaso o Measina i Hawaii - po’o le Heritage Week. O le vaega tupe lea ma le tupe mo le 75 tausaga o le Fono o se tasi lea o vaega tupe e sefulutasi e faatupeina e le tala o le tupe faaopoopo.
Ma o le tele o mea o le poloketi na muai faatuina e le faigamalo i le tulafono taufa’aofi mo le tupe fa’aopoopo o le tausaga tupe 2022, lea na le mafai ai ona maua le lagolago tele a le Senate ma le Maota i le Fono Lona 4 a le Fono Faitulafono lona 37 i le tausaga talu ai ma o lea na otometi ai ona faatoilaloina le tulafono.
O le aofaiga tupe e pito sili ona maualuga o le tala o le tupe o lo o fuafua i le tausaga faaletupe 2023 - e sili atu i le $3.1 miliona - mo le Ofisa o le Kovana mo le lagolagoina o atinae tetele, felauaiga ma faalavelave faafuasei i Manu’a e aofia ai ae le gata i le tali atu i le luluina o Manu’a ma le ono afu o mauga mu, aveeseina o tagata, fausia o auala e sosola ese ai ma sone saogalemu ma saunia mo isi manaoga o tagata Manu'a i taimi o faalavelave faafuasei.
O isi polokalama po’o poloketi fa’atupeina ma ona fa’amoemoega:
• Fono Faitulafono e fa'atatau i mana'oga fa'apitoa mo le fa'agaioiga a le Fono Faitulafono e le o ta'ua i le Tala o le Tupe 2023, $500,000;
• Ofisa o le Kovana e fa'alautele le konekarate tusi Centennial e lagolago ai mataupu fou e fa'amauina ai faigamalo o iai nei, $250,000;
• Tuuina atu e le Ofisa o le Kovana se tupe fa'atutusa mo poloketi a le Bipartisan Infrastructure Law, $500,000;
• Matagaluega o Mataupu Tau Tulafono (Ofisa o le Loia Sili) mo totogi mo loia o lo’o suia Amerika Samoa i mataupu o lo’o tulai mai pe fa’agasolo i fa’amasinoga i fafo atu o le teritori, $500,000;
• Komisi o le Gagana Samoa e totogi le lisi, totogi au faigaluega, ma isi tupe alu, $500,000;
• Ofisa Su'etusi a le Teritori mo totogi ma tupe fa'aalu mo tagata faigaluega mo le Su'etusi a le Teritori po'o le aufaigaluega a le Ofisa Su'etusi a le Teritori, $150,000;
• O le Ofisa o le Kovana e tu’uina atu le $100,000 a le Komisi o le Toefuata’iga a Amerika Samoa ma le Ofisa o le Kovana mo le fa’afoeina ma le aufaigaluega; ma
• Ofisa o le Kovana mo taumafaiga e fa’amalosia le taofia o fualaau fa’asaina, $500,000.
O lea tulafono tau fa’aofi o lo’o fa’atupe mai i tupe maua e le’i fa’apaketi, e le’i fa’atatauina, ma tupe maua e le’i fa’aaogaina mai le tausaga fa’aletupe 2021.
E le gata i lea, o le a aloaia ma avea ma tulafono lenei pili pe a pasia e le Fono ma saunia e le ali’i kovana ona o le mana’omia vave o le fesoasoani i le tu’uina atu o tupe talafeagai mo galuega a le malo.
