LUMABAS ang dating tikas ni GM Mark Paragua upang tulungan ang Philippine men’s team na ilista ang 2-2 draw kontra No. 5 seed Poland sa round 7 ng 44th World Chess Olympiad na nilaro sa Chennai, India nitong Biyernes ng gabi.
Trending sa social media ang panalo ni Paragua laban kay Super Grandmaster Jan-Krzysztof Duda (ELO 2750) sa board 1 matapos ang 37 moves ng Sicilian.
Nakalikom ana ang men’s team ng 10 match point upang sumiksik sa 14th hanggang 32nd place sa event na ipinatutupad ang 11 rounds Swiss system.
Natablahan nina Pinoy GMs Rogelio Barcenilla Jr. at John Paul Gomez sina GM Kacper Piorun at GM Wojciech Moranda sa board 2 at 3, ayon sa pagkakasunod.
Kinapos naman si GM Darwin Laylo kay GM Mateusz Bartel.
Muling mapapalaban ang Philippine men’s team sa round 8 dahil katapat nila ang No. 25 seed Greece.
Samantala, impresibo ang laro ni former Philippine Chess star Super GM Wesley So (USA) nang talunin si GM Hrant Melkumyan ng Armenia.
Nauwi sa 2-2 draw ang laban kaya nanatili sa top spot ng team standings ang Armenia na may 13 match points. (Elech Dawa)
