Pinabibilisan ni Senador Robinhood ‘Robin’ Padilla ang pagbuo ng lupon na magbibigay ng kabayaran sa mga apektado ng Marawi Siege noong 2017.
Sa Senate Resolution 8, hinikayat ni Padilla ang Office of the Executive Secretary na suriin ang mga magiging myembro ng Marawi Compensation Board (MCB).
“It has been five years since the Marawi Siege transpired and the victims are still awaiting the implementation of (Republic Act) 11696 in the hopes that they can finally return to and rebuild their homes after suffering as internally displaced persons for half a decade,” ani Padilla sa kanyang resolusyon.
Marami aniyang inosente ang nasawi at nawalan ng tahanan at gamit matapos umatake ang mga terorista sa Marawi noong 2017.
Noong Abril 2022, ipinasa ang RA 11696 o ang Marawi Siege Victims Compensation Act of 2022 kung saan may bubuuhing MCB na magpapatupad sa pagbigay ng compensation sa mga biktima.
Itatalaga ng Pangulo ang isang chairperson at walong miyembro. Tatlo sa kanila ay dapat taga-Philippine Bar at kung maaari ay Maranao lawyers.
Dalawa ay dapat kumakatawan sa civil society organization at isa rito ay Sharia lawyer o Muslim traditional leader. Dapat isa rito ay licensed physician, certified public accountant, educator at licensed civil engineer. (Dindo Matining)
