Iceland
This article was added by the user . TheWorldNews is not responsible for the content of the platform.

Tap Isavia 221 milljón

Heildarafkoma samstæðu Isavia eftir skatt var neikvæð um 221 milljón á fyrri helmingi ársins. 

Þetta kemur fram í tilkynningu frá félaginu. 

Þar segir að rekstrarafkoma af samstæðu Isavia fyrir afskriftir, fjármagnsliði og skatta (EBITDA) á fyrri helmingi ársins 2023 hafi veirð jákvæð um 1.777 milljónir króna samanborið við 968 milljónir króna fyrir sama tímabil á síðasta ári. Aukningin nemi um 809 milljónum króna.

Tekjur samstæðunnar jukust um 4.272 milljónir króna milli tímabila og námu 20.085 milljónum króna.

Neikvæð áhrif má rekja til gengisáhrifa 

„Heildarafkoma tímabilsins var neikvæð um 221 milljón króna samanborið við jákvæða afkomu upp á um 501 milljón króna fyrir sama tímabil í fyrra. Þessa lækkun á heildarafkomu má rekja til breytinga á gengisáhrifum vegna langtímalána í erlendri mynt. Fjárfestingar samstæðunnar námu um 8.197 milljónum króna á fyrstu 6 mánuðum ársins og má rekja langstærsta hlutann, eða um 7.802 milljónum króna til framkvæmda á Keflavíkurflugvelli,“ segir í tilkynningunni. 

Þá segir að á fyrstu sex mánuðum ársins hafi um 3,4 milljónir farþega farið um Keflavíkurflugvöll. 

Fundið vel fyrir kostnaðarhækkunum

„Rekstur samstæðu Isavia á fyrstu sex mánuðum ársins var nokkuð í takt við okkar eigin væntingar,“ segir Sveinbjörn Indriðason, forstjóri Isavia, í tilkynningunni.

„Við höfum eins og önnur fyrirtæki fundið vel fyrir kostnaðarhækkunum síðustu missera og erum að róa öllum árum að því að mæta þeim.“ 

Þá kemur fram, að langtímaáætlanir félagsins geri ráð fyrir frekari uppbyggingu á Keflavíkurflugvelli.

Gert ráð fyrir áframhaldandi vexti

„Á sama tíma og við erum að eiga við kostnaðarhækkanir þá gera okkar áætlanir ráð fyrir áframhaldandi vexti í fjölda farþega sem mun fara um Keflavíkurflugvöll,“ er einnig haft eftir Sveinbirni.

„Við munum því áfram leggja áherslu á uppbyggingu á flugvellinum ásamt því að styrkja aðra innviði félagsins“. 

mbl.is