Iceland
This article was added by the user . TheWorldNews is not responsible for the content of the platform.

Flestir vilja betur mannaða bráðaþjónustu

Flestir aðspurðra í könnun sem Gallup gerði fyrir heilbrigðisráðuneytið segja að bætt mönnun á næstu heilsugæslustöð eða sjúkrahúsi myndi skipta mestu þegar kemur að því að auka öryggi bráðaþjónustu við fólk. Margir nefndu einnig styttri viðbragðstíma sjúkraflutninga.

Niðurstöður könnunarinnar eru nú aðgengilegar á vef Stjórnarráðsins.

Ánægjan eykst með hækkandi aldri

Um 55% aðspurðra segjast ánægð með núverandi fyrirkomulag bráðaþjónustu í þeirra heimabyggð. Nokkur munur er á viðhorfi fólks eftir heilbrigðisumdæmum þar sem íbúar á Norður- og Vesturlandi eru ánægðastir en síst þeir sem búa á Vestfjörðum og Suðurnesjum. Ánægja með fyrirkomulag þjónustunnar eykst með hækkandi aldri. Minnst er ánægjan hjá þeim sem eru 18-29 ára (42%) en mest hjá 70 ára og eldri (63%).

Þegar kemur að einstökum þáttum bráðaþjónustu telja flestir mikilvægast að bæta bráðaþjónustu á næstu heilsugæslustöð eða sjúkrahúsi vegna minni háttar veikinda eða slysa en bætt fæðingarþjónusta skorar einnig hátt. Athygli vekur að hærra hlutfall íbúa í heilbrigðisumdæmi Vestfjarða en í öðrum umdæmum nefnir að bæta þurfi bráðaþjónustu á vettvangi vegna alvarlegra veikinda eða slysa.

Mikill meirihluti með reynslu af þjónustunni

Um 87% aðspurðra höfðu reynslu af bráðaþjónustu í heimabyggð, ýmist sem aðstandendur einhverra sem þurftu á bráðaþjónustu að halda (47%) eða af eigin reynslu (39%). Um 3,8% svarenda starfa sjálf við bráðaþjónustu í heimabyggð. Tæplega 31% sagðist þó enga reynslu hafa af bráðaþjónustu í heimabyggð.

Könnunin fór fram á netinu. Í úrtaki voru 2.260 manns 18 ára og eldri, utan höfuðborgarsvæðisins og Akureyrar, auk 200 manna aukaúrtaks meðal íbúa Vestmannaeyja. Þátttaka var 44,8%.

mbl.is