Iceland
This article was added by the user . TheWorldNews is not responsible for the content of the platform.

Boða lækkun á sköttum á bíómiða og áfengisframleiðslu

Í áformum um breytingar á ýmsum lögum um skatta og gjöld kemur fram að til standi að setja bíómiða í lægra þrep virðisaukaskatts og að sjálfstæðir áfengisframleiðendur greiði lægra áfengisgjald af ákveðnum magni áfengis. Einnig stendur til að taka upp samtímabarnabætur um næstu áramót. Það þýðir að tekið verður mið af barnastöðu eftir ársfjórðungum þegar kemur að útgreiðslu barnabóta.

Morgunblaðið skýrir frá þessu í dag og segir að þetta komi fram í áformum sem fjármála- og efnahagsráðuneytið hefur birt í samráðsgátt stjórnvalda.

Með samtímabarnabótum munu foreldrar aldrei þurfa að bíða í meira en fjóra mánuði eftir greiðslu barnabóta en í núverandi kerfi getur verið allt að árs bið frá fæðingu barns.

Hvað varðar gistináttaskatt þá er ætlunin að hann verði lagður á hvern gest en ekki hverja gistieiningu eins og nú er og mun hann einnig ná til gesta í skemmtiferðaskipum.

Lagt er til að breytingar verði gerðar á gjaldtöku vegna umsókna um dvalarleyfi, ríkisborgararétt og vegabréfsáritanir. Meðal annars um að gjald fyrir vegabréfsáritun verði tengt við gengi evru.