Iceland
This article was added by the user . TheWorldNews is not responsible for the content of the platform.

600 þúsund tonna ávinningur á ári

Baldur Pétursson, verkefnastjóri alþjóðlegra verkefna hjá Orkustofnun, segir að samstarfsverkefni Íslands og Póllands í orkumálum í Póllandi komi til með að skila ávinningi á sviði loftslagsmála sem muni nema um það bil 600 þúsund tonnum minni losun koltvísýrings á hverju einasta ári.

Til að setja það í samhengi er gert ráð fyrir að Ísland muni minnka losun um 120 þúsund tonn á ári.

Tækifæri fyrir íslensk fyrirtæki

„Þarna er tækifæri fyrir íslensk fyrirtæki að hefja samstarf við pólsk og nýta sér þannig alþjóðlegt fjármagn í sinni starfsemi,“ segir hann en bæði pólskir og evrópskir sjóðir láta sig verkefnið varða.

Verkefnið er hluti af verkefnum uppbyggingarsjóðs EES-samningsins.

Baldur segir að það sé hluti af stóra verkefni uppbyggingarsjóðsins í Póllandi og sé á sviði umhverfis,- orku,- og loftslagsmála. Aldrei áður hafi umhverfis-, orku- og loftslagsmál verið sameinuð í einu verkefni.

Hann segir stóra áfanga í loftslagsskrefum muni nást með lausnum í orkumálum sem sé ávinningur fyrir alla því í loftslagsmálum séu engin landamæri.

„Þarna sést kannski vel hvað alþjóðasamstarf innan EES-samningsins getur skilað miklu á sviði loftslagsmála. Ég held að fleiri lönd muni fara þá leið að sameina verkefni í umhverfis-, orku- og loftslagsmálum.“

mbl.is